Бокс/ММА

Бектемир Мелиқўзиев профессионал боксда фаолиятини давом эттиради

Ҳаваскор бокс бўйича Осиё чемпиони, Рио олимпиадаси кумуш медал соҳиби, жаҳон чемпионати совриндори Бектемир Мелиқўзиев фаолиятини профессионал боксда давом эттирадиган бўлди. Бу ҳақда GoSport.uz манбалари хабар бермоқда.

Сўнгги вақтларда -81 кг вазн тоифасида жангларда иштирок этиб келаётган Мелиқўзиев куни кеча АҚШга жўнаб кетган. Бектемир Мелиқўзиев у ерда ”Мир бокса” промоутерлик компанияси билан шартнома имзолаши кутилмоқда.

Маълумот учун, мазкур промоутерлик компаниясида бугунги кунда ўзбекистонлик бир қатор боксчилар, жумладан Шаҳрам Ғиёсов (7-0, 6 КО), Муроджон Аҳмадалиев (5-0, 4КО), Исроил Мадримов (2-0, 2 КО) ва Баҳодир Жалолов (5-0, 5 КО) шуғулланиб келишмоқда. Бектемир айнан мана шу компания билан шартнома тузаётган навбатдаги ўзбекистонлик спортчи бўлади.

Эслатиб ўтамиз, кеча ҳаваскор бокс бўйича жаҳон чемпионати йўлланмасини тақдим этувчи Осиё чемпионати учун Ўзбекистон терма жамоаси таркиби эълон қилинган ва ундан Бектемир Мелиқўзиев ўрин олмаганди.

“Мир бокса” промоутерлик компанияси ўзбекистонлик боксчилардан ташқари WBA чемпионлик камари соҳиби Дмитрий Бивол (16-0, 11 КО), собиқ жаҳон чемпиони Александр Поветкин (34-2, 24 КО) ва WBA вақтинчалик камари соҳиби, собиқ жаҳон чемпиони Денис Лебедев (32-2, 23 КО) каби машҳур боксчилар билан ҳам ҳамкорлик қилиб келади.

Долзарб хабарлар

Мавзуга оид