Бокс/ММА

Фазлиддин Ғоибназаров “Жисмоний тарбия ва спорт аълочиси“ унвони билан тақдирланди

Рио олимпиадаси чемпиони, айни вақтда профессионал боксда фаолият олиб бораётган боксчи Фазлиддин Ғоибназаров “Жисмоний тарбия ва спорт аълочиси” кўкрак нишони билан тақдирланди. Бу ҳақда вазирлик матбуот хизмати хабар берди.

Боксчи “мамлакатимизда жисмоний тарбия ва спортни ривожлантириш, ёшлар ўртасида олимпиада ҳаракатини тарғиб этишдаги фаол иштироки, Рио-де-Жанейро (Бразилия) шаҳрида бўлиб ўтган XXXI ёзги Олимпиада ўйинларидаги юксак спорт маҳорати ва мардлиги, халқаро спорт майдонларида Ўзбекистоннинг нуфузи ва обрў-эътиборини оширишга қўшган ҳиссасини инобатга олиб мазкур унвон билан тақдирланди“, дейилади вазирлик хабарида.

Таниқли спортчига мазкур мукофотни Жисмоний тарбия ва спорт вазири Дилмурод Набиев топширди.

Эслатиб ўтамиз, Фазлиддин Ғоибназаров 19 январь куни Нью-Йоркда доминиканлик боксчи Рикардо Гарсияга қарши жанг ўтказиб, рақибини муддатидан олдин таслим этиб, ғалаба қозонганди. У ҳозиргача профессионал боксда ўтказган барча еттита жангида ғалаба қозонган, тўрт марта рақибларини нокаутга учратган.

Долзарб хабарлар

Мавзуга оид