Oʻzbekistonlik yengilmas bokschi yana bir raqibini nokautga uchratdi

Professional boksning yengil (-61,2 kg) vazn toifasida faoliyat koʻrsatadigan oʻzbekistonlik bokschi Ravshanbek Umurzoqov (7-0, 6 KO) navbatdagi jangida ham gʻalaba qozondi. Bu haqda GoSport.uz internet-nashri muxbiri xabar berdi.

Rossiyaning Yekaterinburg shahrida boʻlib oʻtgan boks kechasida Umurzoqovga bu safar fillipinlik Rimar Metuda (12-5-1, 7 KO) raqiblik qildi. 8 raundga moʻljallangan jang 4 raund davom etdi.

Toʻrtinchi raundning 1:16 daqiqasi ortda qolganda Umurzoqovning ketma-ket zarbalari nihoyat natija berdi. Aynan shu daqiqada Ravshanbekning chap qoʻlda raqibning jigar qismiga bergan zarbasidan soʻng Metuda yerga quladi va hakamning 10 soniyalik sanogʻidan soʻng ham oʻrnidan tura olmadi. Natijada hakam nokautni qayd etdi.

Ushbu gʻalabadan soʻng Ravshanbek muddatidan oldin gʻalabalari sonini 6taga yetkazib oldi. Bundan oldin u 2018 yilning 10 noyabr kuni Kelli Figeroani 6 raundda texnik nokaut evaziga magʻlubiyatga uchratgandi.